1.   Pawlpi Upa a vaikhakte' min:- Sian Khaw Cin, Thawng Za Al, Lian Vungh, Ngah Lian, Hau Siing, Thang Za En, Kam En, Phawng Cin, Vum Khaw Langh.

2.   “Pawlpi ka u ka naute aw, kapa Pasian' hong thupiakna bang in um aa, mawhna kisiik kikna a neite- a mawhna kiphel nadingin Pasian kiangah paaina na bawlsak ding uh hi. Tua mah bangin Vantung Gamnuam a ngah nadingin Pasian' Hinlootui tawh na kiciam sak ding uh hi. Tua kiciamna na piak nadingun ka lai sungaa thute na en ta un. Ahih hangin tua kiciamna piakna pen mi khempeuh in na pia thei kei ding uh hi. Paainaleen Pasian' Siampite bek in na zangh thei ding uh hi.

3.   Tua khit ciangin naute aw, ka pian' zawh kum sawmnih ka phak aa kipan tuni dong, kum sawmguk leh kumkua sung, Pasian' hong hilhna bangin na ka seem hi. Ahih hangin Kei in Khamtung gamah Pasian hangin a thuak masa pen ka hih manin, Pasian' deihna bangin na kiseem khinzo nailo hi. Bang hang hiam na cih uh leh Pasian' min suangin Pasian a paai mi kimkhatte in zong, Pasian a upna lian zo nailo thamlo-in, dawi biakna tawh kipawl khanglui ngeinate khiazo nailo uh ahih manin, Pasian' deihna bangin Pasian lam-ah a niin leh a siang kikhen kiimzo nailo aa, leitungah Pasian' na ka sep, ka hun a bei ding ahi ta hi. Tua ahih ciangin tu-aa ka deihna seh sawmsuah sehkhat kizui zo pan aa, Pasian' Thuphate genkhawm lo-in leitung a nusia ding ka hita hi.

4.   Naute aw, lung himawh kei un; Kei in Pasian' deihna bangin leitung a nusia ding ka hi zongin, tu aa na upna uh sangin ka nung ciangin Pasian' deihna taktak hong piangzaw aa, khangto zaw ding hi, cih ka muhkholh manin lungnuam-in kong nusia ding hi.

5.   Tua ciangin note in "Ih pa Pau Cin Hau in leitung hong nusia leh, a thu bei ding hi," ci-in na ngaihsun kha ding uh hi. Tua bangin na ngaihsun kei ding uh hi. Bang hang hiam na cih uh leh, kapa Pasian in leitung aa hong thupiakte- bei ngeilo ding hi, a cih mah bangin, Pasian' hong thupiakte in cikmah hun-in a bei ngei kei ding hi. Tua thamlo in Pasian' Thupha- ka lai sungah na phawk zawh nailoh uh thute zong a omlai ding hi. 

6.   Tua ahih ciangin naute aw, Pasian' Thupha na ngahnop uh leh, na Nu na Pa na simmawh, na zo thawh kei ding uh hi. Bang hang hiam cih leh note aadingin amaute' sungah Thupha kipia khinzo hi. Na u na nau uh leh mi khempeuh na it ding uh aa, ki-itna bulphuh-in, na gamtaa ding uh hi. Pasian kiangah deihna na nget laitakun, na gaalpa in hong that nuam ahi zongin na thuak ding uh hi. A thuakzo mite in Thupha a ngah ding uh hi. Pasian um-in muangin, Pasian tawh na kinai'den zawh nadingun, na hanciam ding uh hi. Pasian tawh a kinai mi in, Pasian' itna a ngah hi. Hih thute in Pasian' hong thupiak na ahi hi. Tua ahih mah bangin Pasian um aa, ki-itna na neih zawh uh leh, Vantung Thupha na ngah ding uh thamlo-in, leitung na nusiat hun uh a tun' maa-in zong, Leitung Thupha na ngah ding uh hi," ci-in hong vaikhak hi.

7.   Tua bangin Kamsaangpipa- Laipianpa in kam hong vaikhak ciangin Pawlpi Upate in "Laipianpa aw, Pasian paaina na nasep kum sawmguk leh kumkua pha ta aa, na thuzui masate zong a om lai hi. Ahih hangin kimkhatte in zong, nang om napi-in hong taisan uh ahih ciangin, tu-in nang' hong nusia leteh, akpi nokai - api sangak in a matsak mah bangin, ka mangthang ding uh tawh kibangin ka ngaihsun uh hi," a ci uh hi.

8.   Tua ciangin ih pa- Laipianpa Pau Cin Hau in "Hilo hi,naute aw, Pasian um-in, Pasian' deihna bang na ngaihsun tawntung ding uh hi. Leitungah Pasian' thu in a manpha, gentehpih theih ding a om lo ahih mah bangin, a masate zong hong nunung ding aa, a nunungte zong hong masa ding hi. Kei zong, Pasian' hong teelkhiat ka hih hangin, Amaa deihna bang taktak ka zuikiim zo nai kei hi. Ahih hangin Mangmuhna sungah Keimah- Pasian' Kamsaangpipa' gennate na ngaihsun le-uhteh, Pasian' deihna bang taktak - tutawm in na seemzo pah nai kei uh ahi zongin, dawimaangpa tawh na kinai loh nadingun, mailam-ah na hahkat ciat ding uh hi.

9.   Pasian in Amaa deihna Thubulpi hong pia ahih hangin, dawi biakna sungaa om u leh naute tawh kizoploh a phamawh thute hangin, Pasian' deihna bangin na a seemzo ka hi kei hi. Ahih hangin leitung kihei na ding Pasian' hong hilhna bangin a taangtung zo tampi om khin ahih ciangin, Leitung u leh nau in a masa ahi kei hi. Pasian- amasa ahi hi. Tunung ciangin ka thugente- hong taangtung toto dingaa tua ciangin nong phawk kik pan ding uh hi. Tua ahih manin kong thugente- ka nung ciangin na kisiik kikloh nadingun, na tu na ta, khang sawn sawnte hun dongin na ciamteh ding uh hi," ci-in hong gen hi.

10.   Tua ciangin Pawlpi Upate in "Hi hi, Laipianpa aw, na cih mah bangin zuih khialhna in ki-itna pan hong piangkhia ahi hi. Tua bangin u leh nau ki-itna pan dawimaangpa' deihna a tun' theihna thu-nong gen ka zak uh ahih mah bangin, kote zong na thuzui ka hih uh hangin hong nusia leteh zuih khialhna ka tun' khak ding uh a lauhuai hi. Tua ahih ciangin tu-aa zuih khialhnate sungah Pasian' min lakna tampi ki-nei ahih manin, tuate zangh le-ungh, ka khial ding uh hiam?," ci-in a dongh uh hi.

11.   Kamsaangpipa- Laipianpa in "Naute aw, na thei khial ding uh hi. Kei' tung pan a pianglo thu leh mi' gamtatna- zuihnate na eng, na zangh kei ding uh hi. Pasian' thu Pasian' deihna bang na ngaihsun tawntung ding uh hi. Bang hang hiam cih leh Pasian' min paulap aa "Maanglaak" kici zuihna tampi leh aangsung ngaihsun, min leh za' zoong mite' zatna tampi a om hi. Tua bang aiisaan mite in a Tote' min beel-in, naseem uh aa, van-gilte tawh luang pumpi kitatna bawl-in, a seem uh hi. Tuate in Pasian' lamkhak-dawimaangpa' sawltaak- aiisaan Ciin Luan leh aiisan tuamtuamte tung pan hong piang khia ahi hi.

12.   Tua ahih ciangin Kei' thu- Pasian paaina sungah a om mite in, na zat khialh loh nadingun, mite' gamtatnate na eng kei ding uh hi. Pasian' lamkhak dawimaangpa' sawltaakte- lam tuamtuam panin hong lut loh nadingin, paaina tawh na kidal ding uh hi.

13.   Mangmuhna tawh Pasain' hong piak thu khempeuh, a kuamah peuh in thei sianglo pi-in deih bawl'-in, ahih kei leh bawlsia-in, na genkhial kei ta un," ci-in a vaikhak hi.

​

​