MANGMUHNA  1

(Pasian' Thupiakcilna)

 

1. Kam Hau gam Ukpipa pu Khua Cin' maan hunsung, Tediim khua-ah kateen laitak, zankhat-in, a zahtaakhuai leh a lunghihmawh huai aw-ging lian mahmah khat kaza hi. 2. Tua aw-ging in: "Pau Cin Hau, a theilo mi theisak in; a mulo mi musak in; a zalo mi zasak in; nuntaakna hongpia- Keimah na Pa Pasian' mintawh," ci-in aw-ging kazak ciangin lamdangsa-in, patau-in ka thokhia hi. 3. Innsungpan innpua-ah paikhia-in, innkaa-ah khua kadak leh, nisuahna lam Vantung panin tehpih theihding a omlo, a lamdang vaang hongtaangsuk kamu aa, tuasung panin hong kilangh khia, a vanglian Pasian in: "Aw…. Pau Cin Hau, nangin kongteelpa na hi hi. 4. Kei-in nuntaakna, hehpihna, hotkhiatna leh vaangliatna Thupha namkim tawh kidim, vaanglianpen "Pasian" ka hi hi. 5. Kei simloh adang vaanglian zaw omlo hi. 6. Pau Cin Hau aw, Khamtung mite-na nuntaakna uh lung' nuntaakna zong baan zolo hi. 7. Tua ahihciangin leitung mite lakah kongsawl bangin thu nahilhding hi. 8. Khamtung mite-in na khua-ul uh leisungah tongkhat tumdong aa lo nakhawh uh hangin na khamkei uh hi. 9. Tua ahihciangin Ka Thusiangtho leh Ka Thupha hong zui un," hong ci hi.

 

 

MANGMUHNA 2

​

1. Pasian in Vantung-nisuahna lam pan hong kilangh suk-in, thu hong pia hi. 2. Hong thupiakna in: "Aw, Pau Cin Hau, mivom mikaangte zong khedap aa kipan kihilh ahih manin, tu-in a leeng thei zo uh hi. 3. Tua ahih ciangin Vantung Thusiangtho phatakpi-in zui un. 4. Tua hi leh Khamtung mite zong na leeng thei ding uh hi. 5. Kongpiak thute na zuih kei uh leh, vanpi luumnih luumthum-in hong luum ding hi. 6. Leipi luumnih luumthum-in hong luum ding hi. 7. Mualpi hong cim ding aa, minpi hong cim ding hi. 8. Tuuk hong taam ding aa, maau hong taam ding hi. 9. Tua thu teng hong pian' khit aa, nong zuih kei teitei uh leh, a tawp na ciangin kial hong tung ding aa, na tuinaak uh gu' hong suak ding hi," ci-in thu hong pia hi.

 

 

MANGMUHNA 3

​

1. Pasian in Amaa Thusiangtho a zui dingin hong sawl laitak hun-in, Khamtung mite in dawi biak up na lian lua aa, Pasian' thu zuih ding kuamah in a lungngai thei nai kei uh hi. 2. Tua hun sungin ei- leitung mihingte in Pasian' vaangliatna mukhia aa, Pasian tawh ih kizop na a pian' nading, kumzawn natna ka thuak na leh Pasian' hong hotkhiatna thu, a lamdang vaangliatna, Keimaa tung tawn-in Pasian in hong piangkhiasak hi. 3. Keimah Pau Cin Hau in Pasian' hong thupiak khit hunkhat ciangin, kumsawm leh kumnga sung tawntung damlo zawngkhaal-in ka om hi. 4. Tua bang aa ka om hunsungin ka lungkham mah mah ahih manin, nikhat nii-tak ciangin keimah leh keimah -gamsungah kikap lum ning, ci-in thau thunsa lawngkhat tawh ka paikhia hi. 5. Ka kikap lup nading mun ka tun' ciangin, vantung panin "Aw-ging' ka za hi. 6. Tua Aw-ging in: "Pau Cin Hau aw, na kikap lum kei in. 7. Na pumpi uh na bawlsiat uh leh mawhna hi," a ci hi. 8. Tua aw-ging ka zak khit phet-in, Pasian in ka kikap lup theihloh nading aa hong geelsakna bangin, ka mai-ah sakhital khat hong om aa, keimah leh keimah kikap lup nading aa ka thau puak tawh tua sakhi kapin ka man hi. 9. Keimah leh keimah pumpi kikap lup nading aa ka puak thauvui kapkhat bek tawh, tua sakhi kapzo ka hih manin, ka kikap lup nading thauvui leh thautang a om nawn kei aa, Pasian hong khaamna mah bangin ka kikap lum thei nawn kei hi. 10. Tua mun panin ka sakhi mat tawh innlam zuan-in ka ciah hi. 11. Inn ka tun' ciangin kanu Cing Zam in lamdang hong sa-in: "Kata aw, nang sii ding aa om kimlai- sa nong puak," ci-in lungdamna leh khasiat mahmahna kigawm khawm-in, a khitui luang-in hong dawn hi. 12. Tua ka kikap lup theihlohna leh Vantung aw-ging-inn ka tun' ciang-in ka ngaihsun aa, eimau' pumpi bawlsiat ding- Pasian in a deihloh na thu ka phawk kik hi.

 

 

MANGMUHNA  4

​

1. Khatvei Pasian in: "Pau Cin Hau aw, Vantung gam en kawikawi in," ci-in hong sawl hi. 2. Tua hong sawlna mah bangin, ka nungzui ka sawltaakte tawh ka pai uh hi. 3. Vantung gam ka tun' uh ciangin, Pasian' gam leh dawi' gamgi kikhen-na, luikuampi khat in a dei hi. 4. Pasian' gam lam pen nisuak lah hilo-in, vaang taang-in a noptuak mah mah hi. 5. Dawi' gam lam pen, khua mialcip-in a om ka mu hi. 6. Tua ciangin ka nungzuite' kiangah: "En un; Pasian' gam leh dawi' gam hibang ahi hi" ci-in thu tampi ka hilh hi. 7. Ka thuhilhna ah: "Pasian' thu na zuih kei uh leh, dawi' gam khua mialna sung na tun' khak ding uh, lauhuai kasa hi. 8. Leitungah na om lai tengun, mi' heh nadingin na gamta kei un. 9. Zuauthu tawh mi na zo nuam kei un. 10. Mi' neihsa na guksak kei un. 11. Bang hang hiam na cih uh leh, mite na hehsakna uh mah bangin, mite in note hong hehsak ding hi. 12. Zuauna tawh mi na zawh uh leh, na zuauna uh mah bangin, mite in zuauna mah tawh hong zo ding uh hi. 13. Mi' neihsa na guksak uh leh, tua mah bangin mite in zong note' neihsa a gu ding aa, Pasian' deihna tawh kilehbulh gamtatnate a suak ding thamlo-in, leitung na nusiat hun uh a tun' ciangin, tu aa na muhna uh-dawi' gam na tun' khak ding uh lauhuai hi," ci-in ka nungzuite tungah ka gen hi.

 

 

MANGMUHNA 5

​

1. Kapa Pasian in: "Pau Cin Hau aw, tu pan kipanin mailam hong pai ding kumgiat hunsungah leitungah a nungta, azu ava aa kipan ganhing khempeuh na that thei kei ding hi. 2. Tua mah bangin dawite in zong hih kumgiat sungah leitung mihing ganhingte a hong that thei kei ding uh hi. 3. Hih kiciamna in Thuciam kidemna a hiding hi. 4. Tua ahih manin hih Thuciam kidemna a ciampeelte in vaang niamna, nuainenna a thuak ding uh hi. 5. A zote in vaangliatna, gualzawhna a ngah ding uh hi," ci-in thu hong pia hi. 6. Hih Pasian' hong thupiak hun pan kipanin, leitungah a nungta, azu ava, miksii thovaai pan kipan ganhing peuhmah sisak lo-in, kidawm-in ka om tawntung hi.

 

 

MANGMUHNA 6

​

1. Pasian in: "Pau Cin Hau aw, vantung gam na mukhin zo hi. 2. Tua ahih ciangin leinuai gam na en kawikawi ding hi," ci-in hong sawl hi. 3. Pasian' hong sawl bangin leinuai gam en dingin ka pai hi. 4. Tua ka paina panin thakhat thu-in leinuai khua ka tung hi. 5. Tua bang aa leinuai khua thakhat thu-aa ka tun' na in, Pasian' hong piak vaangliatna ahi hi. 6. Leinuai gam ka vel kawi kawina munkhat ah Tuinuai Kumpinu hi, ci-in, numei khat a om hi. 7. Tua tuinuai kumpinu ka et ciangin, a khe nuai-ah mulneel a po aa, amah tawh kamkhat beek kihoo lo-in, ka paikhia hi. 8. Tua bang aa ka paikhiat khit ciangin mualdung khat ka zui aa, mual leh mual kituahna munkhat-ah dawimaangpa lungzaai kiang ka tung hi. 9. Dawimaangpa in: "Aw, Pau Cin Hau, nang Pasian' teelpa na hih leh hih ka siing -siingkuang aa om, ka aii-aiikuang aa omte ne in," hong ci hi. 10. Kei in: "Pasian' teelpa- nang in na kheemzo kei ding hi," ci-in ka dawng hi. 11. Tua khit ciangin ka paikhia leuleu aa, thakhat thu-in leitung ka kipatcilna phual ka tung kik hi. 12. Leitung ka tun' ciangin "Pasian in mi a uk leh vaanglian- Thu siangtho tawh uk hi, dawite in mi a uk leh bumh tawh uk hi" ci-in ka thei hi. 13. Dawite in, mihingte' muan ding, suan ding, zu leh sa tawh biak ding ut uh ahih manin, mihingte tungah bumh leh aii tawh naseem in, a bawlsia thei uh hi. 14. Hih bangin dawite in mihingte tungah thu tuamtuam tawh naseem ahih hangin, Keimah in Pasian' teelpa ka hih manin, Pasian' hong piak vaangliatna hang' tawh hong kheemzolo-in, a hong bawlsia zo kei uh hi.

 

 

MANGMUHNA 7

​

1. Vantung panin vaangliatna khuavaak hong taangsuk aa, tua sung pan hong kumsuk Pasian in- Kei hong sam hi. 2. "Pau Cin Hau aw, sin in," hong ci hi. 3. "Kapa Pasian aw, bang sin ding, cih ka thei kei hi," ci-in ka dawng hi. 4. Tua ciangin Pasian in: "Nang-kitangsapna khat na nei hi, tu-in lai sin in, hong hilh lengh na thei ding hi," hong ci hi. 5. Pasian in laibu khat a tawi aa, suangtang neu pawlkhat la-in, tua laibu tungah a koih aa, gawmzel-in, a khenzel hi. 6. "Ka suangtang bawl bangin na bawl thei ding hiam? ci-in hong dongh hi. 7. Kei in: "Ka bawl thei mah ding hi," ci-in ka dawn kik khit ciangin, A maa bawl bangin kisin-in ka bawl leh, ka bawl thei hi. 8. Tua bangaa ka bawl theih khit ciangin, Pasian in laibu khat hong pia hi. 9. Tua laibu hong piak khit aa kipanin, ka lungsim sungah lai deihna leh lai bawl ding ngaihsutna lianpi hong teeng aa, ka lungsim hong phawng den ahih manin, sun leh zan in ka ihmusip thei kei hi. 10. Tua bangin lai vive bek ngaihsun-in ka om ciangin, Pasian' hong hilh mah bangin Lai aw ding leh Laimal ding- ka lungsimsung pan Pasian in hong phuulkhiasak aa, abaan abaan-in ka bawl ka bawl hi. 11. Ka bawl masak sak ka zangh pah pah aa, kumnih ciangin ka bawlkhin ta hi.

 

 

MANGMUHNA 8

​

1. Lei zaanglaaipi khat-ah mihon tampi kikhawm-in a om ka mu aa, leitung minam khempeuh a om kiim hi. 2. Tua mihonte' kikhopna-ah Kei zong kapai hi. 3. Tua mihonte' tung- van panin khau-hual khat a kaisuk hi. 4. Tua khau-hual tungah a kah dingin mi tampi a kidem uh hi. 5. Ahih hangin a kahzo mi khat beek a om kei hi. 6. Tua mihonte- khat beek a kah zawhloh ciangin, Kei-kah dingin ka kithawi hi. 7. Ka kah ding ciangin Pasian kiangah paaina ka bawl hi. 8. Tua ka paaina kammal in "Vantung aa om kapa Pasian aw, leitung aa om na sawltaak, na tapa- Keimah-Pau Cin Hau in, leitung mihingte' aading ka sepzawh nading leh, na vaang limpi ka lah zawh nading in, na Vantung Gamnuam ah kong kahto ding hi," ci-in paaina ka bawl hi. 9. Paaina ka bawl khit ciangin ka kahtoh leh, ka kahzo hi. 10. Ka kahtohna- Vantung athuap athuap-in na om aa, tua a thuap tuam tuamte-ah, minam tampi a om ka mu hi. 11. Tua bangin ka kahtoto aa, Pasian' gam dong thuap sawmthum apha hi. 12. Pasian' omna gam- thuap sawmthumna ka tun' ciangin, Pasian' gam pen vaang taang-in a nop mah mah hi. 13. Tua Pasian' Gam ah, leitung mite a tung kua mah a om nai kei hi. 14. Pasian' Gam ka tun' khit ciangin, tua khauhual zui-in ka kumsuk kik aa, ka kipat cilna mun ka tung hi. 15. Ka tun' ciangin tua mihonte kiangah "Lung himawh kei un; note aa dingin Vantung Gamnuam ka mu zo hi," ci-in thu ka hilh aa, amaute zong a nuam mahmah uh hi. 16. Tua mun panin lei sungah khau-hual khat a tumsuk ka mu leuleu hi. 17. Tua khau-hual zui-in ka kumsuk leh, leinuai a thuap a thuap-in a om aa, thuap sawmlii ciang ka tung hi. 18. Leinuai thuap sawmlii ciang ka tun' ciangin, tua khau-hual zui-in ka kahto kik aa, ka kipatcilna mun ka tung hi. 19. Tua ciangin tua khau-hual ka dokto aa, ka kiangah kual-vial in ka cian leh, ka dintan nih sangin a saang zaw hi. 20. Tua teng ka muh khit ciangin: "Vantung thuap sawmthum pha hi, leinuai thuap sawmlii pha hi," ci-in ka thei hi. 21. Tua ciangin tua mihonte kiangah thu ka hilh hi. Ka thuhilhna-ah: "Pasian in eite aading aa a bawlsa, a Gamnuam hong lak khinzo hi. 22. Lung himawh kei un; dahmai tawh om nawn kei un; dawimaangpa' hong zolna khau-hual ka dokkhia khinzo hi. 23. Kuamah peuhmah in Pasian' thupiakna bangin um-in, zui-aa, na hahkat nak uh leh, dawimaangpa tawh kipeel-in, Pasian' Gamnuam Siangsawn mun na ngah ding uh hi," ci-in thu ka hilh hi.

 

 

MANGMUHNA 9

​

1. Pasian' hong hilhna bangin leitung mihingte in a theih zawhloh uh ciangin, Keimaa min tawh Pasian' hong sapna aw ka za aa, pian leh khan kikheek nading thute hong musak hi. 2. Pasian in: "Pau Cin Hau aw, leitung mihingte- apian' leh a khan kikheek nadingin ka Nguun inn leh ka Kham inn en in," ci-in hong sawl hi. 3. Pasian' hong sawlna bang aa ka et ciangin, ka mai-ah khat khit khat, aban aban-in hong lak hi. 4. Tua bang aa hong lah ciangin, a hong lah khit masak-sak a seng' pah pah hi. 5. Tua khit ciangin lei aa taai, van aa khazaau bang aa leeng, na lamdang tuamtuamte, tui sungaa pai thei, a taai thei a lamdang tuamtuamte hong lak hi. 6. Tua na lamdang tampite-nikhat tawntung hong lak hi. 7. Tuate hong lah khit ciangin, mi pawlkhatte in kei-thah dingin hong sawm uh hi. 8. Tua mite-Pasian' lamkhak-dawimaang pa' sawltaak hi, ci-in ka thei hi. 9. Tua mite lakah mikaang mi pawlkhat a om hi. 10. Tua mite in Kei-thah ding aa hong sawm laitakin, leizaang munkhat ah ka om hi. 11. Tua thah hong sawmte-nihnih, thumthum in a hong pai uh hi. 12. Tua bangin hong pai uh ciangin, "Puk un" ci-in ka sawl aa, a puk pahpah uh hi. 13. Tua laitakin ka ngaihsutna ah: "Pasian in Amah taangin vaangliatna hong pia hi," ci-in ka ngaihsun hi. 14. Tua bangin nikhat sung tawntung- na lamdang tuamtuamte hong musak leuleu hi. 15. Kei- that ding aa hong paite a bei khit ciangin, suang sakol aki-sim zolo hong pai aa, ka kiang hong tun' ciangin a taai kik aa, ka muh khopna atun' ciangin leivui suak-in a mang hi. 16. Tua suang sakolte a hong pai ding a om nawn kei hi. 17. Tua khit ciangin suang milimte hong pai hi. 18. Tua suang milimte- suang sakolte mah bangin ka kiang hong tun' ciangin a taai kik aa, lei kipei-in, leivui suak aa, a mang khin hi. 19. Tua suang milimte leh suang sakolte- Kei that ding aa hong pai ahi kei hi. 20. Ke'n zong, amaute' sih nading leh puk nadingin Pasian' hong piak vaang tawh thah ding ka ngaihsun kei aa, ka en mawk hi. 21. Tua teng khit ciangin Khamtung mihing khempeuh hong pai aa, a bei khinpah uh hi. 22. Tuate hong lah khit ciangin adang hong lahte ka enzo nawnkei aa, kamai ka hum hi. 23. Tua bang aa ka mai ka hum hangin, Vantung mi khat in ka mit-ah a lengh thei na khat tawh hong lak ahih manin, hong musak teitei hi. 24. Sawtveipi kamuh khit ciangin, ka mit a kham aa, ka et zawh nawnloh manin, inn sung innpua-ah ka pai kawikawi hi, ka mit a kham manin ka mai ka phiat hi. 25. Tua bangaa kamai kaphiat hangin, sunthum leh zanthum tawntung hong musak hi.

26. Adang mipawl khempeuhte- khatvei puk-in a beikhin aa, a nunung ciangin ka muhsa mipawl-khat beek a om nawn kei hi. 27. Tua khit ciangin mikaang mite- ngaavei puk-in a bei hi. 28. Mivom mite- sawmvei puk-in a bei hi. 29. Tuateng khitciangin Kei aa kipan aom laiteng, keen leh keen kikal nuai-ah ka om uh hi. 30. Tua ciangin mihing bangzah om lai hiam ci-aa ka et leh, Kei lam-ah mihing lii a om ka mu hi. 31. A lang lam-ah mihing sagih a omka mu hi. 32. Tua laitakin puan kasilhkei uh aa, leivui baangtawh kibangin kaci tunguh apuanghi. 33. Kei leh tua mipawlte kikal ah mual neu khat in hong hal hi. 34. Tuateng khit ciangin bangmah ka mu nawn kei hi.

 

 

MANGMUHNA 10

​

1. Pasian in hong hotkhiat khit ciangin, leizaanglaipi khat-ah minam tampi kikhawm ka mu aa, tua mun-ah Kei zong ka pai hi. 2. Tua laitakin Vantung panin khuavaak hong taangsuk aa, tua vaangtaang tawh a hong kumsuk Pasian in, Nii sakol-in nei aa, a tungah tuangin, Kei' kiangah hong pai hi. 3. A sakol ka et ciangin a lamdang mahmah aa, a sakol van khempeuh tee-in, a hong lengh hi. 4. Tua laitakin mihonpite kiangah: "En un," ci-in ka kiko-aa, "Hih Pasian' gen khempeuh ih zui ding hi," ka ci hi. 5. Kuamah in Pasian a en ngam kei uh aa, leilam en-in a kuun ciat uhhi. 6. Pasian in Kei hong sam aa: "Pau Cin Hau aw, en in, Ka thu hong manglote leh mawhna tawh kiciamte- hi bangin ka bawl hi," ci-in a khut veilam-in pasal khat -a luzaang humsip panin a khai hi. 7. Pasian in a khut veilam ngaa, a taklam ngaa, a kigawm-in khutsawm nei-in hong kilangh ka mu hi. 8. Pasian in: "Pau Cin Hau aw, Keimah in Van leh Lei, Nii leh Kha, Aksite leh Mihingte, Ganhingte aa kipan, na khempeuh a piangsak, Cinatna nam kim a dam kiksak thei- Vaanglian Pasian ka hi hi," hong ci hi. 9. Tua ciangin Pasian in: "Pau Cin Hau aw, Kei hong paai in," hong ci hi. 10. "Hong koici paai ding ka hi uh hiam?" ci-aa ka dot ciangin, "Van leh Lei a bawl, Ni leh Kha a bawl, Mihing ganhing a bawl Pasian, Cinatna a damsak thei Pasian aw, ci-in hong paai un," hong ci hi. 11. Kuamah in Pasian a en ngam kei uh hi. 12. Tua laitakin Kei in mihonpite thu ka hilh hi. 13. Ka thuhilhna in: "Leitung mihingte aw, hih Pasian in si hen a cihte si aa, hing hen a cihte hing ahih ciangin, hih Pasian' gen bang bangin ih zui ding hi," ci-in thu ka hilh hi. 14. Hih Pasian' hong thupiakna in, ei- Khamtung mite aa dingin Paaina kammal, Pasian' hong piak na hi aa, Pasian Paaina a hong pian' khiat cilna ahi hi.

 

 

MANGMUHNA 11

​

1. Pasian in dawi dem nading thu hong piak mah bangin, kumgiat sung tawntung, leitung aa a nungta- miksi thovai pan kipan a zu a va ganhing khempeuh ka that kei aa, ka tang hi. 2. Pasian' hong thupiak bangin kumgiat khit, a kumkua-na ah, Pasian in: "Pau Cin Hau aw, tu-in kumgiat sungah ka tu ka ta leitung mihingte - dawite in tampi hong that hi. 3. Ei - Vantung mite in mihing genloh-in, a zu-a va aa kipan, ganhing khempeuh kumgiat sungah ih that kei hi. 4.Tua ahih ciangin tu-aa dawite tawh ih ciamna, dawite in ciampeel aa, leitung mihing tampi hong that uh ahih ciangin, tu-in dawite zu leh sa na piakna uh na pia nawn kei ding uh aa, na hawlkhia ding hi." ci-in dawi hawlkhiat nading thu hong pia hi. 5. Pasian in tua thu hong piak manin, dawi biakna a gol pen Pusa pan kipan, a neu pen dong ka phiat hi.

 

 

MANGMUHNA  12

​

1. Tua bangin Pasian in dawi biakloh nading thu hong piak khit ciangin, Laaini zuih ding Thupha hong pia hi. 2. "Laaini-in ka nasepnate na siasak kei un. 3. Na siatsak uh leh, note zong na sia kha ding uh hi. 4. Laaini aa ding thu kong pia hi. 5. Bang hang hiam na cih uh leh, dawite in Laaini-in Leitung mihingte mawhna a zong hi. 6. Tua ahih ciangin Laaini-in na khua-ul uh na suaksak kei un; nahteh pan kipan singkung loopa na sisak kei un. 7. Ganhing na sisak kei un; na neihsa na paaikhia kei un. 8. Mi tawh kinialna kam- na nei kei un; hih kong thupiak teng na siatsak uh leh dawite in "Pasian' thupiak manglo hi" ci-in, na sin na lung uh hong ne aa, mihing kong suaksak kik nuam ahi zongin, bawl nading thu-haksa hi. 9. Tua ahih ciangin Laaini-in Kei-hong paai ta un" hong ci hi.

 

 

MANGMUHNA 13

​

1. Khatvei lampi khat zui aa ka pai laitakin, lamtung munkhat tokhom tungah, Vantung mikhat tuu-in a om ka mu hi. 2. Tua vantung mipa in Kei hong sam aa, tokhom khat hong pia-in, hong tusak hi. 3. Ka tutpih vantung mipa in: "Pau Cin Hau aw, Vantung vaangliatna, Vantung gaalkapte na mu nuam hiam?" ci-in hong dongh hi. 4. Kei in: "Ka mu nuam mah hi," ci-in ka dawn kik ciangin, hong pai na meel kitel lo-in, thakhat thu-in Vantung gaalkap sim zawhloh tampi hong om hi. 5. Tua Vantung gaalkapte in, gaalkap ngeina vaangliatna tawh gaal hong kheem uh aa, hong ensak uh hi. 6. Ka et-gaalkapte' pumpi tungah vaangliatna a taang tuamtuam, a tee zeihzeih a om hi. 7. Tua vaangliatnate, a pumpi tung ciat uh ah aksi bangin a taang ciit ciat hi. 8. Tua bang aa ka et khit ciangin, a paina meel kitheilo-in, a mang hi. 9. Tua teng khit ciangin ka tutpih Vantung mipa in: "Pau Cin Hau aw, tulai takin bang na heh bel hiam?" ci-in hong dongh hi. 10. Kei in: "Pa aw, Lailui khua ka teen laitak aa, gamkaute' hong mat ka heh bel hi," ci-in dawite ka khia hi. 11. Hih thu ka gen khit phet-in, dawite tampi ka kiangah hong om hi. 12. Tua dawite ka et ciangin, a mit tungkhit vive-in a om ka mu hi. 13. Tua laitakin dawite' mawhna phel dingin dawimaangpa hong pai aa, ka et ciangin a haa tongh tantan a pha hi. 14. Ahih hangin dawimaangpa- bangmah pau ngamlo-in a paikhia kik aa, ka tutpih Vantung mipa in thakhat thu-in lei kipei sak aa, tua dawite khempeuh a mangsak hi. 15. Tua khit ciangin ka tutpih Vantung mipa kiangah: "Kei-Lai hong hilhpa ka mukhin zo hi. 16. Nii tung aa tuang, khutsawm nei aa hong kilangh, vaanglianpa zong ka mu khinzo hi. 17. Tu-in Vantung Kumpi a lian bel ka mu nuam hi," ci-in ka thuum hi. 18. Ka tutpih Vantung mipa in: "Vantung Kumpi a lian bel kua-mah in en ngam lo hi. 19. Tu-in na muh nop leh na lungsim sungah Amah na koh kawm-in, na khut sung meek in," ci-in hong sawl hi. 20. Hongsawl mah bangin, ka lungsim sungah: Vantung Kumpipa, kapa Pasian aw, Leitung aa om, na sawltaak, na tapa Keimah Pau Cin Hau, na limpi leh na vaangpi hong lak in," ci-in ka koh kawm-in ka khut sung ka meek hi. 21. Tua bangin ko aa, ka khut sung ka meek khit phet-in, vantung laizang panin mun khempeuh taan-in hong kumsuk aa, van leh lei kikal ah hong khawl hi. 22. Tua Vantung Kumpipa taanglua ahih manin, ka tel zo kei aa: "Kapa Pasian aw, kong mutel thei kei hi, hong kumsuk lai in," ci-in ka thuum hi. 23. Ka thuum khit ciangin hong kumsuklai takpi aa, lei tunglo-in, van- Laizang ah hong khawl hi. 24. Tua ciangin phatakpi-in ka mutel theita hi. 25. Ka muhna lim in, a Vantung innpi tawh hong kumsuk ahi aa, a inn leh Amaa pumpi tung- niitaang in a hong lengh bangin, a lamdang mah mah-in, tee-in, a hong lengh hi. 26.Tua innpi sungah Amah in a Vantung tokhom tungah tuu-in om aa, Amaa pumpi in mun khempeuh taan-in, ki-en theilo zah dongin hong lengh hi. 27. Pasian in a khut langkhat sawm, a langkhat ah sawm, a kigawm-in khut sawmnih nei-in hong kilangh ka mu hi. 28. A aang laizangah a vaangtaang, a tee, Teipak tawh kibang khat, a kitungto hi. 29. Amaa pumpi pen bem sangaa, a golzaw in ka mu hi. 30. Pasian' vaang-taang lua ahih manin, niitaang et tawh kibangin hong lengh hi. 31. Pasian' vaang taang ka muhna in, Vantung gam ka etna sa aa, a taang tawh kibang aa, Vantung gam in Pasian' vaang tawh taang hi, ci-in ka thei kik hi. 32. Tua teng ka muh khit ciangin Vantung Kumpipa- Vantungah a kahto kik hi. 33. Tua ciangin ka tutpih Vantung mipa kiangah: "Vantung Kumpipa, tu-in ka mu khinzo hi. 34. Tua ahih ciangin Vantung gaalkapte ka mu nuam kik hi," ci-in ka ngen hi. 35. Tua bang aa ka nget khit phet-in, Vantung gaalkap tampite in a lamdang, akigen theilo zah dongin, a muhnop huai mah mah-in, gaal hong kheem kik uh hi. 36. Tua gaalkapte' pumpi tung ka et ciangin, Vantung Kumpipa' tungaa ka muh mah bangin, amaute' pumpi tungah tawm ciatin a tee aa, a muhnop huai mahmah hi. 37. Tua teng ka muh khit ciangin, Vantung gaalkapte- Vantung vaangliatna in la hi, ci-in a paina meel kitheilo-in a mang uh hi.

38. Hih thu teng ka muhna tungtawn-in, "Ih omna khempeuh ah, Pasian om hi" ci-in ka thei hi.

 

 

MANGMUHNA 14

​

1. Khatvei, meikiang tokhom tungah tuu-in ka om laitakin, Pasian in hi bangin hong musak hi. 2. Pasian' hong thugen khempeuh ngaihsun kawm-in, lampi khat zui-in ka pai aa, ka paina lampi-ah a meelkaang mikhat leh gaalkap sawm tawh ka kituak hi. 3. Tuate kiangah: "Pasian' thu na zui uh hiam? ci-in ka dongh hi. 4. Tua thu ka dot ciangin amaute in- maizum tuak mahmah uh aa, hong en ngamlo-in, kamkhat beek a hong dawng ngam kei uh hi. 5. Tua ciangin tawlkhat ka pai aa, gaalkap sawmthum leh a ukpa tawh ka kituak hi. 6. Tuate kiangah: "Pasian' thu na zui uh hiam? Pasian' thu na zuih uh leh na um uh hiam?" ci-in ka dongh leuleu hi. 7. Amaute in hongdawng ngamlo-in,a paisuak uh hi. 8. Tua bangin ka pai aa, gamlak munkhat ka tun' ciangin, ka mai-ah vantung muh tawpna dongin a kikhungto- keellei khat ka mu hi. 9. Tua keellei- Kei' kahtoh nading hi, ci-in ka ngaihsun aa, abul ah ka pai hi. 10. Tua keellei phung ka tun' ciangin miniha om hi. 11. Tua minihte in keellei tungah ka kah ding a hong khak uh hi. 12. Tuate kiangah: "Kei' pai nading nong khak nop uh, Pasian' thu na zui uh hiam? na zuih uh leh upna tawh na zui uh hiam? ci-aa ka dot laitakin, Vantung pan aw-ging khat ka za hi. 13. Tua Vantung aw-ging in: "Pau Cin Hau' Vantung pai nading keellei-kuamah in na khak thei kei ding uh hi," hong cih tak ciangin, ka lamhong khak minihte, maizum tuak mahmah-in a taai-khia uh hi. 14. Tua ciangin Vantung panin aw-ging ka za kik aa: "Tua lam hong khak nihte in dawimaangpa' sawltaak hi," a ci hi. 15. Tua khit ciangin tua Vantung keellei ah ka kahto aa, Vantung khua khat ka tung hi. 16. Tua lai-ah mi pawlkhat a om ka mu hi. 17. Tua mi pawlte in: "Na kahto thei nawn kei ding hi," ci-in a hong khak uh hi. 18. Tua laitakin Vantung mikhat in Vantung thuap nihna pan hong leengsuk aa, van laizang hong tun' laitakin: "Pau Cin Hau' pai nading lampi-kuamah in na khak thei kei ding uh hi," ci-in aw-ging ka zak khit ciangin, ka kahto-to aa, Vantung Pasian' Gamnuam ka tung hi. 19. Tua khit ciangin Leitung-ka kipatcilna ah ka kumkik hi. 20. Tua leitung- ka kipatcilna ka tun' kik ciangin, tua ka kahtohna keellei a mang hi. 21. Tua keellei a man' khit ciangin, ka omna mun panin: "Mivom mikaang ka nuaisiahna hi," ci-in Vantung ah ka leengto kik hi. 22. Tua bangin ka leengto aa, Vantung ka tun' kik khit ciangin, Pasian tawh ka kimu hi. 23. Pasian in: "Pau Cin Hau aw, suangtang mal kong piak bangzah ahi hiam? Ka khut bangzah pha, cih na thei hiam? 24. Na nuntaakna- Kei' pumpi ahi hi, kong sawl na pumpi-leitungah a om hi," ci-in hong gen khit ciangin, ka taksa pumpi tawh Vantungah a leeng ka kisak leh, mei kiangaa tokhom tungah a tuu ka hi hi.

 

 

MANGMUHNA 15

​

1. Pasian in Amah paai nading thu hong piak khit, Ngennung khua-ah ka teen laitak, nikhat ni-in, Pasian' hong sawlna mah bangin "Pasian kiangah ki-ap ning" ci-in inn pan ka paikhia aa, Ngennung gamsung 'Suangphuh mual' gamdaihna munkhat ka tung hi. 2. Tua mun panin Pasian' hong thupiakna mah bangin Pasian ka paai aa, "Van leh lei a bawl, Ni leh kha a bawl, mihing ganhing a bawl Pasian, Cinatna a damsak thei Pasian aw, dawite ka biakna ka zuu ka sa miksii thovaai in zong gai zolo hi. 3. Tua ahih manin na aang sungah kong tum hi" ci-in paaina ka bawl hi. 4. Tua bang aa Pasian ka paai khit phet in, Pasian' aw-ging ka za aa, Pasian in "Na nuntaakna Kei-ka om hi," hong ci hi. 5. Tua Pasian' aw ka zak khit phet-in, khuaphia bangin ka lungsim, ka pumpi a lamdang kikheelna hong om hi. 6. Thakhat thu-in ka lungvaak-in, ka lungsim ka pumpi thaksuahna ka ngah aa, kumsawm leh ngaa tawntung zawngkhaal natna pan, a siangtho pumpi cidamna a ngah ka hita hi.

 

​

MANGMUHNA 16

​

1. Pasian in leitung mihingte a pian' sakna limpi hong lak aa, hong ensak hi. 2. Tua laitakin Pasian in khut sawmnih nei-in hong kilangh ka mu hi. 3. Tua Pasian kiangah Vantung Tapa leh a naseemte a pai ngam kei uh hi. 4. Thu a vaihawm uh ciangin, sikkhau kam tawh a vaihawm uh hi. 5. Vantung mikhat sikkhau kamsaang-in a koih hi. 6. Leitung mihingte a pian' nadingin singkuang a bawl hi. 7. Tua singkuang hon'na, khakna- Tawh a neisak aa, a Tawh a heek ciangin, mihing khutpi cia-cia a paikhia hi. 8. Mizawng leh mihau a kidei nadingin, Tawh khat ciat-in kikhen hi. 9. Leitung mihing a bawl- Vantung minih ahi hi. 10. Mihing a bawl nadingin singkuang khat ahi hi. 11. Tua lai-ah Vantung mi- Lai-at lii a om hi. 12. Leitung mihing a bawl- Vantung minihte sung pan khat in, a zawng dingte a pian' nadingin a heek aa, khat in a hau dingte a pian' na ding in a heek hi. 13. Mi bawlte in a hoih kim dingin a bawl uh hi. 14. Ahih hangin Vantung mi- Lai-atte in tua mihing a bawlte a mun dang teng a hoihsak hangin, munkhat peuhmah kitaang sam sak hi.

15. Mi bawlte in Tawh a heek khit ciangin, Pasian' Khaate leeng-in, a bawlsa mite sungah a lutsak hi. 16. A lutsak khit ciangin a suah matengin Vantung mite in lukhungah hong cing' hi. 17. Tua ahih manin Lukhung aa cil siat ding hong khaam hi.

 

 

MANGMUHNA 17

​

1. Kapa Pasian in "Kei-hong paai in," ci-aa thu hong piak khit, Lailui khua-ah ka ten laitak, ziingsang khat phalvaak hun-in, khua ka dak leh inn kiim aa om singkung loopate hing sitset-in, a lamdang a etlawm deuh-in ka mu hi. 2. Tua laitakin Pasian in "Pau Cin Hau aw, Kei in nuntaakna- Vantui- siang ka piangsak hi. 3. Tua nuntaakna Vantuisiang- Hinloo- Damloo tui in, note hin' na hong pia Keimaa vaangliat kicin-na ahi hi. 4. Tua nuntaakna Vantuisiang tawh leitung leh vantung aa om nate ka uk hi. 5. Ka Gamnuam Singzabuang liim nuai aa po Hinloo-Damloo- nuntaakna tui in, Natna pan damna, Sihna pan hin' kikna leh mawhna pan mawhmaaisakna ahi hi. 6. Tua ahih manin upna taktak nei aa, hinloo-damloo tui tawh a kisiansuah, a ne a dawn mi in, nuntaak kik hotkhiatna Thupha a ngah ding hi. 7. Note nuntaakna hong pia- Keimah na Pasian' vaanglianpa' mi suah nadingin Vantuisiang-tho tawh Kei' kiangah hong ki-ap mi in ka Gamnuam a luah ding aa, Vantuisiangtho tawh a kipeel mi in ka Gamnuam ah a lut zo kei ding hi. 8. Tua ahih manin leitung mite in Hotkhiatna Thupha a ngah nadingun, kong teel ka Tapa Pau Cin Hau in, tua nuntaakna -Hinloo damloo- Vantuisiangtho na tawi ding hi," ci-in thu hong pia hi. 9. Pasian in Vantuisiangtho thu hong piak khit ciangin, Vantung panin tuitaak- thawl tawh ka dawh hi. 10. Thawl ah tui a dim ciangin, tuitaak nawnlo-in a om hi. 11. Tua khit ciangin kapa Pasian in Tuisiang Thupha piakna kammal hong pia hi.

 

 

MANGMUHNA 18

​

1. Lai a pian' khitzawh kumguk a cin' hun aa Pasian' hong thupiakna ah Pasian in "Pau Cin Hau aw, Lai phelnih na keem in. 2. Tua khit ciangin Ka min nong phat nadingin Sanginn- Zum na lam ding hi. 3. Tua Zum- deithum-in na dei in. 4. Na Zum phaitam ah sikkhau mung na phut in. 5. Tua sikkhau- Sanginn- Zum sungah na tumsak ding hi. 6. Vantung Gamnuam hangin na hiangah vasa note hong tuang ding hi.

7. Khatna thu panin Tapa sagih na nei ding hi. 8. A nihna thu panin mihing sawm leh khat na ciamteh ding hi. 9. Leitung- ka ta kong pian' sak zawh kum tulkua leh guk a phazo hi. 10. Tu-in kata aw, Khamtung gam a vekpi-in mittaw leh kheelbaai-in om ahih ciangin, tuate honkhia dingin leitungah ka thu hilh-in kong sawl hi," ci-in Pasian in thu hong pia hi. 11. Tua teng thu hong piak khit ciangin, meiingo tawh kibangin vantung ah kahto in a mang hi.

 

 

MANGMUHNA 19

​

1. Pasian in "Pau Cin Hau aw, khamtung gamah Zuu kong khaam ngam kei hi. 2. Bang hang hiam na cih uh leh, Khamtung mite in zuu-na kivaakna uh ahi hi. 3. Ahih hangin neekna lamsangah zuu in gu' ahi hi.

4. Bang hang hiam na cih leh, neekna in mawhna ahi kei hi. 5. Ahih hangin zuu ne-in nuamsa aa, na kham uh ciangin na kamsung uh pan a paikhia kiliat sakna kammalte in dawimaangpa' deihna tawh kipawl -gu' a suak hi. 6. Tua ahih ciangin ka thuzui mite in ki-itna zangh ta un. 7. Unau pata-in na kinei ta un. 8. Ki-itna na zat khit uh ciangin, zuu- Thukhaam ahi kei hi. 9. Tua teng na zuih khit uh ciangin, Vantung Gamnuam aading- Thukhaam zuihna ahi ding hi. 10. Tua bangin kong thupiakna bang na zuih kei uh leh, zuu kong khaam ding hi. 11. Thu kong piak khempeuhte na ngaihsun in. 12. Bang hang hiam na cih leh, singkung tawh kibangin hiang a nei hi. 13. Kong gen thute khempeuh ah zuih ding thu tampi a om hi," ci-in Pasian in thu hong hilh hi.

 

 

MANGMUHNA 20

​

1. Pasian in Thu hong pia hi,  hong thupiakna-ah, 2. "Pau Cin Hau aw, ka pian' saksa leitung aa om nate, a uk a zeek dingin mihing ka piangsak hi. 3. Ka pian'saksa nate it-in, ka keem hi. 4. Amun leh agam tawh kituak- nuntaakna ka pia ciat hi. 5. Leitung mihingte in nuntaakna hong pia- Vaanglian- Keimah Pasian nong phawk nadingun, leitung- vantungah sawltaakte ka koih hi. 6. Tua sawltaakte' tungtawn-in, zuih ding Thusiangtho ka pia hi. 7. Tua ahih ciangin note in nuntaakna hong pia- Keimaa kong piak thu bangin na zui ding uh hi. 8. Note aading aa kong piak zuih ding Thusiangtho a zui mite in, Keihong lungdamsak ahih manin, tawntung nuntaak nopsakna, ka Gamnuam a luah ding uh hi", hong ci hi.

 

 

MANGMUHNA 21

​

1. Khatvei, gamlak munkhat-ah, leitung mihingte tawh a kibanglo, naupang honkhat singhiang tungah a tuang ka mu hi. 2. Tua naupang honte in a khe veei diamdiam in la a sa uh hi. 3. Tua a lasakna ka ngaih ciangin, "Nuai simlei aa lun tate aw, na kaih zatam, gil-al bang mang ding hi ee," ci-in a sa uh hi. 4. Tua khit ciangin huih sung pan Pasian' aw-ging ka za aa,  tua aw-ging in "Pau Cin Hau aw, a vaal-in mi na zo nuam kei ding uh hi. 5. Duhhopna lungsim na nei kei ding uh aa, zuauthu na gen kei ding uh hi. 6. Lungsim hoihlo aa mi zo nuamte tungah, a tu a ta'khang dongun khua a mial ding hi", hong ci hi. 

 

 

MANGMUHNA 22

​

1. Kapa Pasian kiangah Vantung vaihawmna kadot ciang in Pasian in " Pau Cin Hau aw, ko Vantung gamah thu kavaihawm uh ciang un, Leitung  mihingte thu vaihawm bang ahikei hi. 2. Mitphiat tawh vaihawm ka hi uh hi. 3. Mitphiat tawh vaihawm na in Paukhiat kullo, manlang aa lungsim kitheih telna vaihawm nasepna ahihi,hong cihi.

 

 

MANGMUHNA 23

​

1. Mikaang Kumpite hong khan' zawh, Lailui khua-ah ka teen laitakin, Gamdang Mikaang biakna naseem-sawltaak upate Kei' kiangah hong pai uh aa, "Pau Cin Hau aw, ih thu gawm ni in, nang in Pawlpi sum ne-in om lecin," ci-in hong zol uh hi. 2. Amaute in, amau' biakna late hong sa uh aa, thu tampi hong gen uh hi.

3. Ahih hangin Pasian' thukimpihna hilo ahih manin, la a hong sak lai-tak leh thu a hong gen laitakun, amaute kimengcip-in, a lususu uh hi. 4. Tua laitak in Pasian in thu hong pia aa "Thumaan thutang tawh na naseem un, zuauthu tawh na naseem kei un, bang hang hiam na cih uh leh, Mikaangte- amau' gam aa a zat ding, thu kipia zo hi. 5. Note aading aa thu kong piak tungah mi-aa na deih-gawh kei un. 6. Ka teel mite in ka deihna bangin na naseem ding uh hi," ci-in thu hong pia hi.

 

 

MANGMUHNA 24

​

1. Kapa Pasian in "Pau Cin Hau aw, na Nu na Pa uh na simmawh, na bawlsia kei un. 2. Na sanggam uh leh mi khempeuhte tungah mawhna zoong-in na simmawh kei ding uh hi. 3. Tua teng ka thu nong man' kei uh leh, Keimah-Pasian nong mang-ngilh ding uh hi. 4. Tua thamlo-in, a tawpna ciangin mualpi hong cim ding aa, leipi hong cim ding hi," ci-in thu hong pia hi. 5. "Ka Thupha hong zui mite in, ka min phatin na om laitakun, na gaalpa in nang hong that dingin hong pai ahi zongin, itna thupha pia-in, thuklo-in na thuak ding uh hi. 6. Tua bangin thuaklo-aa, lungsim dang a neite in ‘Pasian aw’ ci-in ka min hong suang kei un. 7. Bang hang hiam na cih leh, hong simmawh hong that nuampa na it khit ciangin, hong that dingpa in nang a hong it aa, a hong huhkhia pan ding ahi hi. 8. Tua khit ciangin, dawimaangpa tawh a kipawl, gualnopna leh neekna sungah, na lungsim kisiat nadingin na pai kei ding uh hi. 9. Bang hang hiam na cih uh leh, tua nopnate in note hong siasak ding, dawimaangpa' hong zolna ahi hi," ci-in thu hong hilh hi.

 

 

MANGMUHNA 25

​

1. Pasian in “ Pau Cin Hau aw, no leitung mihingte’neek ding zuu a hong khaam ka hi kei hi. 2. Bang hang hiam na cih uh leh, Kei in leitung mihingte nuntaak nading akicing takin kong pia hi. 3. Ahi zongin note in, note’nuntaak nading aa kong piakte-dawimaang pa zolna-in na nei uh hi. 3. Tua ahih ciangin note’ nuntaak nading aa kong piakte na zatnate uh ah, a khengvaal aa zatnate hangin, dawimaangpa’zolna na suaksak kei ding uh hi,” hong ci hi.

 

 

MANGMUHNA 26

​

1. Pasian in Laaini zuih ding Thupha hong pia khin hinapi-in, ka thuzui mite in Laaini-in Pasian' min phatlo uh ahih manin, Pasian in thu hong pia aa "Pau Cin Hau aw, Thaangsanii aa kipan Sakawnsiamnii dong, leitung mihingte' aading na ka seem aa, Laainii-in ka tawl-ngaa hi. 2. Tua laainii-in na Sanginn na Zum ciat uh ah, Kei' min hong phat ta un. 3. Laainii-in Pasian' min phat noplohna in, dawimaangpa' deihna ahih ciangin, Laainii Pasian' min a phat nuamlo mite in, no leitung mihingte' khialhna tawh Pasian' min hong suang kei un," ci-in Pasian in thu hong hilh hi.

 

 

MANGMUHNA 27

​

1. Pasian in zuih ding Thusiangtho hong pia khin hinapi-in, thuzui mi kimkhatte in Pasian' hong piak Thusiangtho bang zuilo in dawimaangpa' deihna ah lampial aa a om laitak hun-in, Pasian in thu hong hilh kik hi. 2. Pasian' hong thuhilhna ah "Pau Cin Hau aw, na mite kimkhat in Kei hong paailo-in, dawimaangpa' zolna lam a zuan hi. 3. Tua a hih ciangin a siang leh a niin na dei ding hi. 4. Ki-it khit na aw-ka zak khit ciangin, a tawpna ah na pumpi in thuak ta hen. 5. Na nuntaakna Kei ka om hi," hong ci hi.

 

 

MANGMUHNA 28

​

1. Pasian’ hong thupiakna bangaa ka gamtatnate hangin, ka beh ka phung te leh midangte in hong telkhial-aa, bawlsiatna, muhdahnate ka thuak laitakin, Vantung panin Pasian’ aw-ging ka za hi. 2. Tua aw-ging in “ Pau Cin Hau aw, Keimah hangin gimna na thuak hi. 3. Lung himawh kei-in, Kei-hong ko’in. 4. Nang hong telkial mite-itna Thupha na pia in. 5. A tawpna ciangin na gaalpa-na khut taklam hong tung ding hi,” hong ci hi.

 

 

MANGMUHNA 29

​

1. Pasian in hong thupiakcil hun lai-in, mite in hong zui nuamlo ahih manin, cil hong phih aa, hong koo uh hi. 2. Tua thamlo-in, teipi leh thau nangawn tawh thah hong kisawm hi. 3. Ahih hangin Pasian' thukimlo ahih manin, Pasian in "Na nuntaak na Kei' kiangah om hi," hong ci kik hi. 4. Na khempeuh eite' aadingin Pasian in Amaa vaangliatna tawh hong pia nuam ahih manin, dawi biakna nam sawmguk leh giat hong hawlkhiasak hi. 5. Tua ahih manin eite' gimna leh van-gikte beikhin ahih ciangin, Pasian in, dawimaangpa' deihna tawh Amah-Pasian' min ih suan' ding hong nial hi.

 

 

MANGMUHNA 30

​

1. Pasian in Vanlaizang pan hong kumsuk aa,  Nii sangin a taang zaw-in ka mu hi. 2. Tua teng ka muh laitak in Pasian in "Pau Cin Hau aw, suangtang gawmna leh khenna kong hilhzo hi. 3. Khut sawm nei leh khut sawmnih nei-vaangliatna na muzo hi. 4. Khut sawmnih nei na muhna ah Teipi tawh kibang a tee-na muzo hi. 5. Tuate in bang thu hong pia hiam? 6. Pau Cin Hau aw, tu-in nang in zong, kong sawl bangin na naseem ta in. 7. A siang leh a niin na khen nadingin hi bangin na bawl ding hi. 8. Leivuui lak aa om suangtangte na khawm ding aa, na khut veilam-in na tawm ding hi. 9. Na khut veilam tungaa na topsate na en ding aa, na et khit ciangin na khut taklam-in na veilam tung pan na lakhia ding hi. 10. Tu-aa kammal kong thupiakna in khut sawm nei kong lahna ahi hi. 11. Khut sawmnih nei leh Teipi tawh kibang kong lak hi. 12. Tua mah bangin leivuui sung pan suangtang na khopte-na thuzui ahi ding hi. 13. Na khut veilam aa na topte- Thuciamna ahi ding aa, na khut taklam aa na laakte Vantung Gamnuam ngah ahi ding hi. 14. Teipi in a niin leh a siang na khen nading, Keimah-Pasian' vaangliatna ahi hi," ci-in Pasian in thu hong pia hi.

 

 

MANGMUHNA 31

​

1. Khatvei gamlak munkhat ah ka pai laitakin, ka paina mun-ah, a siisa ka U Tual Haang tawh ka kituak hi.

2. Tua ciangin ka U Tual Haang kiangah "U Tual Haang aw, Kei' Thupha umlo aa, adang biakna na zuih, Leitung nuntaakna nusia na hih ciangin, Vantung Gamnuam na ngah hiam? ci-in ka dot ciangin ka U Tual Hang in maizum-in a hong dawng ngam kei hi. 3. Tua khit ciangin tua mun panin ka kikhen khia uh aa, Vantung paina lampi hi ci-in lampi khat zui-in ka pai hi. 4. Tua bang aa ka paina ah, ka U Tual Haang tawh ka kituak kik leuleu uh hi. 5. "U Tual Haang aw, den aa kong thudot- Vantung Gamnuam ngahlo na hi hiam?" ci-aa ka dot kik ciangin ka U Tual Haang in "Ka ngah kei hi," ci-in hong dawng hi. 6. Tua teng khit ciangin ka u ka nau-a siisateng leh ka nungzui ka sawltaak kimkhatte tawh ka kituak leuleu uh aa, Pasian' hong thu piakna bangin thu ka hilh hi. 7. Ka thuhilhna kammalte in "Tu-in Pasian' thu zui un, ci-aa leitung na nuntaak lai vua kong thuhilhna-nong zuih nong man' loh uh, tu-in na phawk uh hiam? ka cih khit ciangin "Pasian' thu in ih pumpi gamtatna, leitung ih nusiat ciangin Khaa aading ahi hi," ci-in thuka hilh hi.

 

 

MANGMUHNA 32

​

1. Lai a pian' khit kum sawmthum leh kum ngaa laitakin, Pasian in thu hong pia hi. 2. Pasian' hong thupiakna in "Laainii sagih, kha sagih, kum sagih hunsung tengah, thukhat hong piang ding hi. 3. Tua thu hong pian' khit ciangin leitung mihing khempeuh ka hong khen ding hi. 4. Tua mihingte kong khen ciangin sehthum suah sehkhat a sii ding uh hi," a ci hi. 5. Pasian' hong thupiak zomna-ah "Pau Cin Hau aw, na inn na siangsak ding hi.6. Tua na inn-nii sawm leh nii sagih hunsung teng khempeuh na siangsak ding hi," ci-in hong sawl hi.

 

 

MANGMUHNA 33

​

1. Vantung Pasian’ aw-ging in “ Asiang leh a niin na dei in,” hong cih laitak hun-in, Pasian deihna taktak kuamah in hong zui kiimnuamlo ahih manin, Pasian in “Dawimangpa deihna leh keimah Pasian’deihna-taanghum leh taangtang bangin dei ta in,” hong ci hi. 2. Tua laitak in Pasian in la khat hong pia aa, (a)Sian ka sian thu gii bang neek teng, Zin aang-ah zaal ding hi ee. (b) Ka nial za-in tam sa’ng ee, ka deih cii-aa tawm aw ee,” ci-in la tawh hong hilh hi.

 

 

MANGMUHNA 34

​

1. Pasian in thu hong pia aa "Pau Cin Hau aw, zuih ding Thusiangthote kong pia zo hi. 2. Kong piak thute in leitung mihingte' zuih ding Thupha ahi hi. 3. Ka deihna bangin a gamtaa mi a tawm hi. 4. Ka Thupha a zuilo mi-in, lamkhial mi ahi aa, man' than' na a thuak ding hi. 5. Lamkhial mi-in a khialhna kiphawk kik aa, lungsim takpi tawh kisiik kik-in, Kei-hong zuat leh, a mawhna ka maaisak ding hi. 6. Lungsim takpi ka deih hi. 7. Lungsim takpi hong piate- ka saang aa, Thupha ka pia hi," ci-in Pasian in hong gen hi.

 

 

MANGMUHNA 35

​

1. Pasian in “ Pau Cin Hau aw, leipaak mite in leitung a nuntaak hun sung aa a thalawh uh Ka Thusiangtho zuihnate hangin, leitung leh vantungah nop sakna Thupha a ngah ding uh hi. 2. Ka pian’saksa leipaak mite in dawimaangpa’ humcipna pan suakta aa, kong lahsa Vantung Ka Gamnuam a tun’nadingun, nang tungah vaangliatna Thupha a kicing kong pia hi. 3. Nang tungah kong piak- vantung  Thusiangtho a zuilo mi-in, a pian’na vantung Ka Gamnuam ah a lut thei kei ding hi,” hong ci hi.

 

 

MANGMUHNA 36

​

1. Kapa Pasian in “ Pau Cin Hau aw, leitung mihing pian’na kong lak zo hi. 2. Vantung Ka Gamnuam pan kong guatsuk Khaa tawh a nungta na hi uh hi. 3. Leitung nuntaakna na nusiat hun ciangun, leitung na pumpi uh leh nuntaak na Khaa kizopna kikhen khia hi. 4. Tua nii hunciangin kong piaksa Vantuisiangtho tawh Kei’kiangah apna nong bawl ding uh hi,” hong ci hi.

 

 

MANGMUHNA 37

​

1. Khatvei gamlak munzaanglaipi khat-ah ka pai hi. 2. Tua ka paina ah leitung mihing a vom akaang minam khempeuh kiim hi, ci-in ka ngaihsun hi. 3. Tuate lakah kei zong pai-in ka om hi. 4. Tua laitakin ka kiang aa om mi tampite in "Pasian' Kamsaang lianpipa in thu hong hilh ding hi,"  ci-in a gen uh hi. 5. Tua bang aa a gen uh ciangin "Kei zong, Pasian Kumpipa dong mu khin ingh aa, Pasian' Kamsaanglianpipa mu nailo ka hih ciangin, ka mu nuam hi," ci-in ka khuadaak hi. 6. Tua bangin khuadaak-in ka om laitakin, keimaa kamsung pan thu hong kigen khia hi. 7. Ka kamsung pan a pusuak kammal in "Leitung mihingte aw, tu-in Pasian' thu zui un. 8. Pasian' thu-phatak aa na zuih kei uh leh, Pasian in leitung mihingte tungah dawite gim hong piasak ding hi. 9. Tua ciangin leitung mihingte in Pasian' thuphatak aa hong zui hinapi-in, dawite in leitung mihingte tungah gim a piak leh, Pasian in nomau taang' in dawite gim a pia ding hi. 10. Mi' pumpi na zahtaakna uh tawh Pasian' thu ka um, ka zui hi, ci-in mi na kheem kei ding uh hi. 11. Dawimaangpa' deihna tawh Pasian' min na suang kei ding uh hi. 12. Tua thu hong khen ding Vantungah Pasian om hi," ci-in ka kamsung pan hong pusuak khia hi.

 

 

MANGMUHNA 38

​

1. Pasian in “ Kei hong thei nuamlo, kong itna leh kong hotkhiatna thu a thei nuamlo, dawimaangpa leh a sawltaak-dawigilote tawh kikop, ka vaang hong dem mite in, ka bawlsa a bei ngeilo gimna thuakna mun dawimaangpa’gam-ah tung ding aa, dawimaangpa leh a sawltaak- dawigilote tawh kipawl-in a om ding uh hi. 2. Keimah- Pasian’thu thei napi theilo bangh, mu napi mulo bangh, za napi zalo bangh-in a om mite in bawlsiatna, gimna a thuak ding uh hi,” ci-in hong gen hi.

 

 

MANGMUHNA 39

​

1. Pasian in "Note in Ka Thusiangtho leh Ka Thupha upna takpi nei aa, na zuih khit uh ciangin, nong ngetnate uh ka hong saang ding aa, ka hong pia ding hi. 2. Cidamna hong ngen un; Ka hong pia ding hi. 3. Pilna siamna hong ngen un; Ka hong pia ding hi. 4. Lungnopna hong ngen un; Ka hong pia ding hi.

5. Neih kicin'na hong ngen un; Ka hong pia ding hi. 6. Vaang neihna hong ngen un; Ka hong pia ding hi. 7. Adang na kisapna Thupha- nong nget uh leh zong, Ka hong pia ding hi. 8. Bang hang hiam na cih uh leh, Kei in kicin' na ka hi hi,"  hong ci hi.

 

 

MANGMUHNA 40

​

1. Pasian in "Pau Cin Hau aw, nang tung aa kong piak Thusiangthote khempeuh in, zii leh ta, u leh naute aading bek ahi kei hi. 2. Mi khempeuhte' aading ahi hi. 3. Mi khempeuhte tungah na gensawn dinguh hi.

4. Leitung mun khempeuh ah na thangsak ding uh hi. 5. Kong piak thute thei gige napi-in, na gen na than' sak kei uh leh, mi tampi' lungsim a khaktan na suak ding uh hi. 6. Hih kong thupiakna bang aa Ka Thusiangtho leh Ka Thupha a than' nading aa a seem a bawl mite in, na sepna, na piakkhiatna uh mah bangin, na tu na ta' khang dongun thuhkikna Thupha kicing na ngah ding uh hi," hong ci hi.

 

 

MANGMUHNA 41

​

1. Khatvei, Kapa Pasian in hong sam aa, "Pau Cin Hau aw, no -leitung mihingte in lungsim kampau leh pumpi gamtatnate tawh mawhna khialh-na na bawl kha thei uh hi. 2. Hihte in dawimaangpa' bawlsiatna, na thuakna hang' uh ahi hi. 3. Keimah - Luumpi-in hong nei aa, Ka liim hong beel mite in, dawi' bawlsiatna tawh na kipeel ding uh hi. 4. Nangmah- Ka Tapa tungah kong piak hehpihna Thupha in, khuavaak bangin a taang tawntung ding hi. 5. Tua Thupha- Khuavaak a beel mi in, hin tawn-tungna a ngah ding hi. 6. Kong piak thu khempeuh in, cik mah hun in, a bei ngei kei ding hi. 7. Pau Cin Hau aw, leitung mihingte' aadingin, Nang tungah a siangtho lungngaih theihna Thupha hong guan' khinzo ka hih manin, hih Thuphate na zeekkhia ding hi," hong ci hi.

 

 

MANGMUHNA 42

​

1. Kapa Pasian in “ Pau Cin Hau aw, na khempeuh a mawkna in a piang khat beek a om kei hi. 2. A piangsak , a nei om hi cih naphawk tawntung ding uh hi. 3. Deih- na neih uh ciang un, a neite tungah ngen-in, phalna tawh na zat uh leh, Thupha na ngah ding uh hi. 4. Deih- na neih laitakun, nong koh mah bangun, na deihna bang vua taangtun’na na ngah uh ciangun zong, zawhna, lungdamna  nong ko’ding uh hi,” ci-in thu hong pia hi.

​

​

MANGMUHNA 43

​

1. Kapa Pasian in thu hong pia hi. 2. "Leitung mihing khempeuh-ka bawlsa vive hikhin na hih manun, ka bawlsa pumpi na it ding uh hi. 3. Nang' pumpi na it mah bangin, midangte' pumpi zong na it un. 4. Nang' pumpi aading na khual mah bangin, midangte' pumpi aading zong na khual ding uh hi. 5. Nang' tungah apha hong kibawl ding na ut bangin, mite' tungah a pha na bawl un. 6. Hih thute in Keima deih- lungsim hoihneihna hi. 7. Ka deihna bang a gamta mi in, na dik na hoihna thaman uh, na tu na ta khang dongun na saang ding uh hi. 8. Na diktat nate uh, na tu na ta te un, Kaam leh vaang-in anei ding uh hi," hong ci hi.

 

 

MANGMUHNA 44

​

1. Khatvei, Pasian tawh kizopna- ka tokhom tungah ka tut laitakin, Vantung meeingo sung panin niizang tawh kibang khuavaak in Kei hong taan hi. 2. Tua laitakin "Van kuuicik - Ka Pa kiangah ciah ta ning' e," ci-in vantungah ka leengto hi. 3. Vantungah ka leentoh ciangin, Nguuntang Khamtangte hoihna tawh zong a kigenteh theilo, hoihna namcin tawh a kibawl a nop mah mah, a vaangtaang- Pasian' Gamnuam ka tung hi.

4. Tua Pasian' Gamnuam in tehpih theih ding a omlo, a meel hoihna leh a tak hoihna namkim tawh a kidim aa, Vantung Kumpi-pa Pasian' vaangliatna tawh a taang tawntunghi. 5. A saa a vot cih omlo, omdan nuam-in, taang silsial aa, a siangtho nopna tawh akidimna mun a hi hi. 6. Tua Pasian' Gamnuam in akhen akhen-in kikhen aa, adei adei-in kidei hi. 7. Keimah in Vantung - Pasian' Misiangthote' omna- Siangsawn mun kava tung hi. 8. Tua Siangsawn mun ka tun' ciangin, ih teenna leitung gam ka ngaihsun kik aa, lungziin- khua ngaih huai kasa mah mah hi. 9. Tua bangin Keimah in Pasian' hong khapna sa-ih luah nading, Kapa Pasian' Gamnuam ah nuamsa-in ka om laitak, thakhat-in ka omzia hong kikheel kik aa, ka tutna sa- Pasian tawh kizopna- Ka Pasian' tokhom tungah a tuu ka hi hi.

​

​